ePaper Gallery

राजधानी नवी दिल्लीतील राजपथ आज (गुरुवार) विविध क्षेत्रांतील मान्यवर आणि नागरिकांनी गजबजून गेला होता. यंदाच्या ६३ व्या प्रजासत्ताक दिनाच्या प्रमुख पाहुण्या यिंगलुक शिनावात्रा यांच्यासह तीन्ही दलांचे प्रमुख, विविध राजकीय पक्षांचे ज्येष्ठ नेते हा प्रसंग डोळ्यांत साठवून ठेवण्यासाठी उपस्थित होते. जम्मू-काश्मीरमध्ये घूसखोरी रोखताना हौतात्म्य आलेल्या लेफ्टनंट नवदीपसिंग यांना मरणोत्तर अशोक चक्र प्रदान करण्यात आले. नवदीपसिंगचे वडील सुभेदार मेजर (निवृत्त) जोगिंदरसिंग यांनी स्वीकारले. यंदाच्या प्रजासत्ताक दिनाच्या प्रमुख पाहुण्या थायलंडच्या पहिल्या महिला पंतप्रधान यिंगलुक शिनावात्रा यांचे स्वागत करताना राष्ट्रपती प्रतिभा पाटील पंतप्रधान शिनावात्रा यांची संरक्षणमंत्री ए. के. अँटनी, संरक्षण राज्यमंत्री डॉ. एम. एम. पल्लम राजू, लष्करप्रमुख जनरल व्ही. के. सिंह यांची ओळख करून देताना राष्ट्रपती प्रतिभा पाटील प्रमुख पाहुण्या पंतप्रधान शिनावात्रा यांना मुख्य सलामी मंचाकडे नेताना इंडिया गेट येथील शहीद जवानांच्या अमर जवान ज्योतीला पंतप्रधान डॉ.

प्रजासत्ताक दिनी लष्करी सामर्थ्यांचे प्रदर्शन

नवी दिल्ली - देशाचे लष्करी सामर्थ्य आणि प्रगल्भ सांस्कृतिक वारशाचे आज (गुरुवार) नवी दिल्लीमध्ये ६३ व्या प्रजासत्ताक दिनानिमित्त भव्य प्रदर्शन करण्यात आले. राजधानीतील राजपथावरील मुख्य संचलनासाठी थायलंडच्या पहिल्या महिला पंतप्रधान यिनलुक शिनावात्रा, या प्रमुख पाहुण्या म्हणून उपस्थित होत्या. पंतप्रधान डॉ. मनमोहनसिंग यांनी इंडिया गेट येथील अमर जवान ज्योती येथे अज्ञात शहीद जवानांना पुष्पचक्र अर्पण केल्यानंतर संचलनाला प्रारंभ झाला. आज सकाळी थंडीला न जुमानता आठ किलोमीटर लांबीच्या राजपथ या संचलन मार्गाच्या दुतर्फा नागरिकांनी प्रचंड गर्दी केली होती. सुरवातीला विविध राज्यांतील सांस्कृतिक चित्ररथांचे संचलन झाले. त्यापाठोपाठ जनरल ऑफिसर कमांडिंग (दिल्ली) ले. जनरल व्ही. के. पिल्लई यांच्या नेतृत्त्वाखाली लष्कर आणि पोलिसांची लष्करी आणि पोलिस बँडच्या तालावर संचलने झाली. सशस्त्र दलांच्या सर्वोच्च कमांडर राष्ट्रपती प्रतिभा पाटील यांनी त्यांची मानवंदना स्वीकारली. या प्रसंगी राष्ट्रपतींशिवाय प्रमुख पाहुण्या यिंगलुक शिनावात्रा, उपराष्ट्रपती हमीद अन्सारी, पंतप्रधान डॉ. मनमोहन सिंग, संरक्षणमंत्री ए. के.

गजर एकता, अंहिसा आणि संस्कृतीचा
आचारसंहितेच्या बडग्यात गोव्यात साजरा प्रजासत्ताकदिन पणजी - देशाची एकता, अंहिसा, संस्कृतीचा गजर आणि स्वातंत्र्यसैनिकांचे गुणगान करणारे मुख्यमंत्री दिगंबर कामत यांचे भाषण, त्याला मिळालेली गोमंतकीय व भारतीय संस्कृतीपर नृत्यनाट्यांची जोड, हे गोव्यातील 63 व्या प्रजासत्ताक दिनाच्या कार्यक्रमाचे आजचे (गुरुवार) वैशिष्ट्य होते. गोवा विधानसभा निवडणुकीच्या पार्श्‍वभूमीवर लागू झालेल्या आचारसंहितेच्या बडग्यातला प्रजासत्ताक दिनाचा कार्यक्रम तासाभरात आटोपला. देशात राष्ट्रपती व राज्यात राज्यपाल भारताच्या गणतंत्रदिनी 26 जानेवारी रोजी दरवर्षी ध्वजवंदन करतात. परंतु यंदा महाराष्ट्राचे राज्यपाल के. शंकरनारायणन यांच्याकडे गोव्याच्या राज्यपालपदाचा अतिरिक्त ताबा आहे. शंकरनारायणन यांना महाराष्ट्रातही ध्वजवंदन करायचे होते व त्यामुळे गोव्यातील झेंडावंदनाची जबाबदारी त्यांनी राज्याचे मुख्यमंत्री कामत यांच्यावर सोपविली. विधानसभा निवडणुका जाहीर झाल्यामुळे आणि कामत हे कॉंग्रेसचे एक इच्छुक उमेदवार असल्यामुळे, त्यांच्या हस्ते ध्वजवंदन करण्यास सरकारने निवडणूक आयोगाकडे परवानगी घेतली होती.

धुळ्यात मनसेच्या "शाई'पासून राज्यमंत्री बचावले
धुळे - प्रजासत्ताक दिनानिमित्त आदिवासी विकास राज्यमंत्री राजेंद्र गावित धुळे जिल्हा दौऱ्यावर आहेत. त्यांच्या हस्ते आज ध्वजवंदन होते. तत्पूर्वी, ते बुधवारी सायंकाळी मुक्कामी आले. त्यांनी येथील साक्री रोडवरील गुलमोहर विश्रामगृहात तळ ठोकला. त्यावेळी जिल्हाधिकारी प्रकाश महाजन, पोलिस अधीक्षक प्रदीप देशपांडे, प्रांताधिकारी तुकाराम हुलवळे, तहसीलदार शिवकुमार आवळकंठे, शहर पोलिस ठाण्याचे निरीक्षक राम सोमवंशी आदी उपस्थित होते. त्यांच्यातील चर्चेवेळी रात्री साडेदहाला "मनसे'च्या माजी जिल्हाप्रमुख प्राची कुळकर्णी, मिलिंद जोशी, नितीन रोकडे व अन्य एका महिला सहकाऱ्याने मंत्री गावित यांना "बीपीएल' सर्वेक्षणासंदर्भात निवेदन देण्यासह चर्चा करायची आहे, अशी गळ घातली. परवानगीनंतर "मनसे'च्या पदाधिकाऱ्यांनी मंत्री गावित यांच्यापुढे मागण्या मांडल्या. चर्चेवेळी श्रीमती कुळकर्णी यांच्या पर्समधून "शाई' गळत असल्याचे मंत्री गावित यांना लक्षात आले. त्यांनी ते निदर्शनास आणून दिले. पोलिस निरीक्षक सोमवंशी व सहकाऱ्यांनी तत्काळ श्रीमती कुळकर्णी व सहकाऱ्यांना मागे हटकले.

धुळ्यात आत्मदहन करणारे 13 अटकेत
धुळे - प्रजासत्ताक दिनानिमित्त विविध कार्यक्रम होत असताना, धुळे शहरात विविध कारणांवरून आत्मदहन करणाऱ्या 13 जणांना पोलिसांनी आज अटक केली आहे. न्यायासाठी दोंडाईचा येथील उपोषणकर्त्या चार व्यावसायिकांनी येथील जिल्हाधिकारी कार्यालयाजवळ सकाळी अकराला, तर खलाणे (ता. शिंदखेडा) येथील दोन भावांमधील कौटुंबिक वाद प्रकरणी नऊ जणांनी थेट जिल्हा पोलिस अधीक्षक कार्यालयाच्या प्रवेशव्दारात दुपारी बाराला अंगावर रॉकेल टाकून पेटवून घेण्याचा प्रयत्न केला. सतर्क पोलिसांनी हे प्रयत्न अयशस्वी ठरवले. दोंडाईचा पालिका क्षेत्रात आठवड्यापूर्वी मुंबई उच्च न्यायालयाच्या औरंगाबाद खंडपीठाच्या आदेशानुसार अतिक्रमण निर्मूलन कारवाई राबविण्यात आली. तेथील धुळे- नंदुरबार रस्त्यावरील व्यंकटेश मार्केटची 78 दुकाने हटविण्यात आली. तथापि, ही दुकाने 1987 मध्ये शासनाच्या आदेशानुसार "सिटी सर्व्हे'तील नोंदीत समाविष्ट झाली. यामुळे मालमत्ता पत्रक व सातबारा मिळाला. याआधारे ही दुकाने हटवू नये, अशी मागणी प्रशासनाकडे केली.

नकी, नदीमच्या चौकशीसाठी पोलिस पथके मुंबईत
मुंबई - झवेरी बाजार, ऑपेरा हाऊस आणि दादर कबुतरखाना येथील 13/7च्या बॉम्बस्फोटांप्रकरणी एटीएसने (राज्य पोलिसांचे दहशतवादविरोधी पथक) अटक केलेल्या नकी अहमद शेख आणि नदीम शेख यांच्या चौकशीसाठी अन्य राज्यांतील पोलिस पथके मुंबईत दाखल होऊ लागली आहेत. या पोलिस पथकांतील अधिकारी त्यांच्या राज्यांतील बॉम्बस्फोटांबाबत या आरोपींकडून माहिती मिळवण्याचा प्रयत्न करत असल्याचे एटीएसमधील वरिष्ठ अधिकाऱ्याने सांगितले. मुंबईतील 13/7 च्या तिहेरी बॉम्बस्फोटांची एटीएसने उकल केली. त्यानंतर इंडियन मुजाहिदीनने अन्य राज्यांत घडवलेले बॉम्बस्फोट तसेच त्या राज्यांत पसरवलेल्या "स्लीपर सेल' जाळ्याबाबत परराज्यांतील पोलिस पथकांकडून माहिती मिळण्याची अपेक्षा व्यक्त केली जात आहे. इंडियन मुजाहिदीनचा म्होरक्‍या यासिन भटकळ ऊर्फ इम्रानला नकी शेख 2008 पासून ओळखत असल्याने त्याच्याबाबतची अधिक माहिती मिळवण्याचा प्रयत्नही या पथकांकडून केला जात आहे. मुंबईत स्फोट घडवण्यासाठी दुचाकी वाहने चोरताना नकी आणि नदीम यांनी आणखी दोन युनिकॉर्न मोटरसायकली चोरल्या. या मोटरसायकली त्यांनी रेल्वेगाडीतील "ब्रेकव्हॅन'मधून दरभंगा येथील मूळ गावी पाठवल्या.

विरोधकांच्या अब्रूची लक्तरे वेशीवर टांगू

मुंबई - मुंबईत आम्ही काम करून दाखवले आहे. पण विरोधक काही ठिकाणी कचरा टाकून छायाचित्र प्रसिद्ध करत आहेत, असा आरोप शिवसेनेचे कार्याध्यक्ष उद्धव ठाकरे यांनी आज केला. आता भगव्या आणि निळ्या झेंड्याखाली मर्द मावळा एकटवला आहे त्याला डिवचू नका. वेडेवाकडे आरोप केलेत तर तुमच्या अब्रूची लक्तरे वेशीवर टांगू, असा इशाराही त्यांनी विरोधकांना दिला. मुंबई कोणत्याही स्थितीत कृपाशंकर सिंह यांच्या हातात जाऊ देणार नाही, असेही ते म्हणाले. शिवसेना, भाजप आणि रिपब्लिकन पक्षाच्या महायुतीच्या प्रचाराचा नारळ आज उद्वव ठाकरे यांच्या हस्ते फोडण्यात आला. विक्रोळी येथे झालेल्या या सभेला भाजपचे नेते गोपीनाथ मुंडे, रिपब्लिकन पक्षाचे अध्यक्ष रामदास आठवले यांच्यासह मनोहर जोशी, रामदास कदम, विनोद तावडे, संजय राऊत, राज पुरोहित, आदित्य ठाकरे आदी नेते उपस्थित होते. महापालिका निवडणुकीच्या निमित्ताने आता बोलके पोपट उडू लागतील, कॉंग्रेसची पितरे दिल्लीतून मुंबईत उतरतील असे टोले उद्धव ठाकरे यांनी लगावले. कोणत्याही स्थितीत येथील मराठी माणूस मुंबई कृपाशंकर सिंहच्या हाती जाऊ देणार नाही.

एसटी देणार नुकसानभरपाई
मुंबई - पुण्यात एका एसटी बसचालकाने बस पळवून नऊ जणांचा बळी घेतल्याच्या पार्श्‍वभूमीवर आगामी काळात चालकांच्या मानसिक-शारीरिक तपासणीसाठी कायमस्वरूपी उपाययोजना करण्यासाठी तांत्रिक समिती स्थापन करण्यात आली आहे. ही समिती महिनाभरात अहवाल सादर करेल. ती बस पळवून नेणारा संतोष माने हा मनोरुग्ण असल्याची चर्चा सुरू असली, तरी एसटीकडे तशी नोंद नाही, असा दावा महामंडळाचे व्यवस्थापकीय संचालक दीपक कपूर यांनी केला आहे. त्या घटनेतील 9 मृतांच्या कुटुंबीयांना प्रत्येकी एक लाख आणि 29 जखमींना प्रत्येकी 50 हजार रुपयांची मदत दिली जाणार आहे. खासगी रुग्णालयांत उपचार घेणाऱ्या जखमींचा वैद्यकीय खर्चही एसटी महामंडळच करणार आहे. स्वारगेट येथील त्या प्रकारानंतर तातडीने घटनास्थळी दाखल झालेल्या कपूर यांनी संबंधित चालक आणि त्याच्या आदल्या दिवशीच्या (ता. 24) सहकारी वाहकाकडून माहिती घेतली. मात्र 24 जानेवारीच्या सायंकाळी 7.30 वाजता गाणगापूर येथून एसटी बस घेऊन आलेल्या माने याच्या वर्तनात काहीही आक्षेपार्ह वाटले नाही, असे त्याच्या सहकारी वाहकाने सांगितले.

बनावट सिमकार्डनंतर आता चोरीचे मोबाईल
मुंबई - मुंबईतील 13/7 च्या तिहेरी बॉम्बस्फोटांचा छडा बनावट सिमकार्ड रॅकेटच्या साह्याने लावल्यानंतर आता इंडियन मुजाहिद्दीनचे नवे दरभंगा मॉड्यूलचे सदस्य चोरीचे मोबाईल वापरत असल्याचे चौकशीत पुढे आले आहे. बॉम्बस्फोटांप्रकरणी दहशतवाद विरोधी पथकाने (एटीएस) अटक केलेल्या नदीमच्या चौकशीत हे मोबाईल बिहार, मुंबई व पुण्यातून चोरण्यात आल्याची विश्‍वसनीय माहिती आहे. बनावट सिमकार्डच्या गुन्ह्यातील आरोपी नकी शेख व नदीम शेख यांचा सहभाग मुंबई स्फोटात पुढे आल्यानंतर आता त्यांनी काही मोबाईलही चोरी केले असल्याचे तपासात उघडकीस आले आहे. नदीमच्या चौकशीत त्यांनी मुंबई, पुणे आणि बिहारमधून सुमारे 13 मोबाईल चोरल्याचे पुढे आले आहे. एटीएसच्या तपासात यापूर्वी झवेरी बाजार व ऑपेरा हाऊस येथील स्फोटांमध्ये वापरण्यात आलेल्या मोटरसायकलीही नदीम व नकी यांनी हरकिशनदास रुग्णालय व व्ही. पी. रोड येथून चोरल्याचे स्पष्ट झाले होते. मुंबई बॉम्बस्फोटांप्रकरणी एटीएस यासीन भटकळसह वकास व तबरेज या दोन पाकिस्तानी दहशतवाद्यांचा शोध घेत आहे. त्यांच्याकडील पॅनकार्डही बनावट कागदपत्रांच्या साह्याने पाटण्यातून बनविल्याचे पुढे आले आहे.

महाराष्ट्रातील 43 जणांना राष्ट्रपती पोलिस पदके
मुंबई - प्रजासत्ताक दिनाच्या पार्श्‍वभूमीवर राज्य पोलिस दलातील तीन वरिष्ठ अधिकाऱ्यांना उल्लेखनीय सेवेबद्दल तर 40 पोलिस अधिकारी आणि कर्मचाऱ्यांना गुणवत्तापूर्ण सेवेबद्दल राष्ट्रपतींची पोलिस पदके जाहीर झाली आहेत. दर वर्षी प्रजासत्ताक दिनाच्या पार्श्‍वभूमीवर उल्लेखनीय व गुणवत्तापूर्ण कामगिरी बजावणारे पोलिस अधिकारी आणि कर्मचाऱ्यांना राष्ट्रपतींच्या पोलिस पदकाने सन्मानित करण्यात येते. या पदकप्राप्त पोलिस अधिकारी आणि कर्मचाऱ्यांची यादी आज सायंकाळी केंद्रीय गृह विभागाने जाहीर केली. महाराष्ट्र पोलिसांच्या प्रशासन विभागाचे अतिरिक्त पोलिस महासंचालक कौशलकुमार पाठक, राज्य गुन्हे अन्वेषण विभागाचे (सीआयडी) अतिरिक्त पोलिस महासंचालक अशोक धिवरे, गडचिरोलीचे उपमहानिरीक्षक सुनील रामानंद, लाचलुचपतविरोधी पथकाचे उपमहानिरीक्षक निकेत कौशिक व कालिना येथील पोलिस प्रशिक्षण केंद्रातील पोलिस उपायुक्त हरविंदर वराईच यांचा पदकविजेत्यांमध्ये समावेश आहे. यापूर्वी पाठक यांनी कोल्हापूर परिक्षेत्राचे विशेष पोलिस महानिरीक्षक म्हणून तर धिवरे यांनी तुरुंग विभागाचे महानिरीक्षक म्हणून काम पाहिले आहे.

'फेसबुक', 'ट्‌विटर'वरील माहितीवर नियंत्रण अशक्‍य
मुंबई - फेसबुक, यू ट्युब, ट्‌विटर यासारख्या सोशल नेटवर्किंग साईटस्‌वरील वैयक्तिक अकाऊंटवर अपलोड होणाऱ्या माहितीवर नियंत्रण ठेवणे अशक्‍य बाब असल्याचे स्पष्टीकरण निवडणूक आयोगाच्या अध्यक्ष नीला सत्यनारायण यांनी आज दिले. त्याच वेळी अशा प्रकारच्या डिजिटल माध्यमांचा निवडणूक प्रचारासाठी वापर करण्यासंदर्भात कोणत्याही राजकीय पक्षाने आतापर्यंत आयोगाशी संपर्क साधलेला नाही. या साईटस्‌वर प्रचारासंदर्भात मजकूर माहिती अपलोड करण्यापूर्वी राजकीय पक्षांनी आयोगाची परवानगी घेणे आवश्‍यक आहे, असेही त्या या वेळी म्हणाल्या. सध्या सोशल नेटवर्किंग साईटस्‌ वापरणाऱ्यांची संख्या देशात कोट्यवधींच्या घरात आहे. केवळ मुंबईतच "फेसबुक'चा वापर करणाऱ्यांची संख्या 43 लाखांच्या घरात आहे. "यू ट्युब' व "ट्‌विटर'चा वापर करणाऱ्यांची संख्याही मोठी आहे. त्यामुळे प्रचारासाठी डिजिटल मीडियाचा वापर करण्याकडे राजकीय पक्षांचा ओढा आहे. अनेक राजकीय पक्षांनी "फेसबुक'सारख्या सोशल नेटवर्किंग साईटस्‌वर स्वतःची पेजेस तयार केली आहेत. मतदारांना आकर्षित करण्यासाठी या पक्षांनी ब्लॉगचाही वापर करणे सुरू केले आहे.

पुण्यातील कृत्य; अपमान वा नैराश्‍यातून
ठाणे - स्वारगेट येथे घडलेल्या घटनेतील एसटी चालक संतोष माने याचे कृत्य हे अन्याय्य परिस्थितीच्या विरोधातील वा त्यातून आलेल्या नैराश्‍यातून घडले असावे. एसटी महामंडळ माने हा मनोरुग्ण नव्हता, असे सांगत आहे. मात्र मानसिक चाचणी होते त्याक्षणी तो माणूस निरोगी असतो, पण जेव्हा एखादी घटना घडते तेव्हा सभोवतालची परिस्थितीही आणि व्यक्तीची सद्य मानसिक स्थिती तितकीच महत्त्वाची असते. माने याचे कृत्य हे थंड रक्ताचे (कोल्ड ब्लडेड) कृत्य असल्याचे मत येथील प्रादेशिक मनोरुग्णालयाचे अधीक्षक डॉ. संजय कुमावत यांनी व्यक्त केले. माने याचे हे कृत्य ही खूप सामान्य गोष्ट असल्याचे मतही त्यांनी नोंदविले. यामागचे कारण स्पष्ट करताना ते म्हणाले, 'नार्वे किंवा अमेरिकेत पौंगडावस्थेतील मुले किंवा पुरुषांकडून अशा घटना घडलेल्या आहेत. या बहुतेक घटना या नैराश्‍यातून किंवा मला समाजव्यवस्थेचा बदला घ्यावयाचा आहे, या भावनेतून घडतात, त्यात माणूस हा "टार्गेट' केला जातो,'' अशी मीमांसा त्यांनी केली. परदेशात शस्त्रास्त्रे सहज उपलब्ध होत असल्याने तिथे अशा घटनांमध्ये त्याचा वापर होतो, माने याने वाहनाचा वापर केला.